- كورنا مرض ملهوش علاج اطلاقا حتى الان كل اللى بيحصل فى اللى بيدخل المستشفى انه بيتوفرله جوا مناسب ومتابعة صحية فى محاولة لتقوية جهازه المناعى وبعد الحالات بتحتاج رعاية مركزة لان الفيروس ده بيصيب الرئة وبيسبب ضيق تنفس شديد فالبتالى المريض بيحتاج الى جهاز بيضخ هواء بضغط الى الرئة علشان يفضل عايش على امل ان مناعته تقدر تقاوم (احنا فى الظروف العادية فى مصر احيانا بنلاقى صعوبة اننا نلاقى سرير فاضى فى الرعاية)
- عدد الناس اللى توفت فى العالم كله من اول السنة حتى الان بكل الاسباب (12 مليون) وعدد الناس اللى توفت من كورونا حتى الان (8 الاف) بس ده مش معناه انه حاجة بسيطة .. الفكرة ان خطورته فى قدرته العالية على الانتشار والخطورة فى ده انه هيسبب انهيار النظام الصحى فى اى دولة فى العالم مهما كانت عظمى او متقدمة يعنى عدد المرضى هيزيد ومش هيلاقوا مكان فى المستشفيات بالاضافة للضرر اللى هيقع على اصحاب الامراض التانية اللى مش هيلاقوا مكان فى المستشفيات بالاضافة الى انهاك الطواقم الطبية اللى بشتغل ليل نهار وبالتالى نسبة 2% اللى بيتكلموا عنها هتزيد جدا وده اللى حصل فى ايران ان المعلن عنه ان النسبة تجاوزت 4% وايطاليا 7% وحاليا فى ايطاليا بالرغم من ان فيه ناس اصلا بتموت فى بيوتها الاطباء هناك بدات تدى اولوية للاصغر سننا فى دخول المستشفيات .. لو هنتكلم بالرياضيات احنا واقعين فى دالة تزايدية يعنى العدد كل يوم بيبقى ضعف اليوم اللى قبله مش نسبة ثابته بتزيد .. دول من الاتحاد الاوروبى صرحت ان الامر لسه موصلش ذروته بالرغم من كل ده ومفيش حد فيهم فى ايده يعمل حاجة .. المسؤلية هنا مجتمعية بحتة
- بالنسبة بقى لموضوع حميات العباسية .. من الساعة 8 -12 الظهر كان فيه هناك حوالى 400 حالة رايحة تكشف مصابين بحالة هلع وعصبية وكانت بتوصل خناقات كمان على مين يكشف الاول المشترك بين الناس دى كلها اعراض السخونية وهنا حابب اوضح حاجة وده من الحالة اللى قلتلكوا تعافت
ان اعراض المرض زى ما كلنا عارفين ارتفاع درجة حرارة ,الام فى الجسم ,سعال ,وصداع .. بس الفكرة انه بتبقى قوية جدا المصاب مش بيقدر تقريبا يمشى على رجله اصلا وتحصل مرة واحدة مش بالتدريج بس ده مش معناه اللى يحس بارتفاع فى حرارته ميروحش المستشفى بس لو انت شاكك فى حاجة على قد ماتقدر تعزل نفسك عن اسرتك وتكشف عند طبيب فى عيادة وهو لو شاكك فى حاجة هيقولك روح الحميات او اتعامل بادوية خافض الحرارة وانتظر يومين لو متحسنتش روح المستشفى الفكرة ان المستشفى هى الجهة اللى هيروحلها المصاب الحقيقى فمتروحش هناك وتعرض نفسك وتعرض اللى معاك للخطر خليها اخر خطوة
- متدخلش اى مستشفى ولا عيادة اليومين دول بدون كمامة ولا جوانتى لازم لازم لازم
- متكونش فى تجمعات كبيرة بدون كمامة (زى المترو)
- الكمامة من اهم ادوارها هتخليك متلمسش وجهك وانت بره لان الايد اخطر من التنفس فى نقل العدوى
- الفيروس وزنه تقيل نسبيا فمش بيطير فى الجو ولكن بيستقر على اى حاجة حواليك تانى اوعى تلمس وجهك وانت بره
- وانت بتخلع الكمامة اوعى تمسكها من الامام ولكن فكها من الاستك او الرباط فى الجنب وارميها
- الكمامة مش بتستعمل عدة مرات (فى طرق مختلفة على النت ازاى تصنع كمامة من مناديل ورقية علشان لو مش لاقيها او غالية عليك)
- لما تكح او تكح فى الهواء كده لازم تغطى فمك باى حاجة ولو ملقتش كح فى كمك مش فى كف ايدك (مش فى كف ايدك)
- الشباب اللذيذ اللى ماشى فى الدنيا بصدره مش هامه حاجة فى مؤتمر منظمة الصحة النهاردة اعلنت فى فيه وفيات شباب واطفال ولو مش خايف على نفسك خاف على اهلك
- لبس الكمامة والله العظيم مش عيب.
- النسبة الاكبر فى الوفيات رجال بسبب التدخين بشكل اساسى
- بلااااااااااااااااش شيشة
- لكل الناس اللى لازم تنزل علشان شغلها لو مش لاقى مطهر يبقى كلور وخففه بالمياه ونظف بيه مكانك فى الشغل كل يوم
- اغسل ايدك كل ساعة على الاقل وتجنب لامس مواضع لمس الاخرين زى مقابض الابواب وافتح الباب بكتفك مثلا وكل حاجة كده بقى وانت ابتكر
- عد من 1 – 30 وانت بتغسل ايدك اقل من كده الغسيل ملوش لازمة
- المطهر الكحولى اللى معاك ده تطهير الاشياء مش ايدك لانه بيضر بالجلد مع كثره الاستخدام ايدك اغسلها بالصابونة عادى
- وانت داخل البيت اوعى تدخل بجزمتك جوا البيت واوعى تسلم على حد قبل ما تغسل ايدك
- صلوا فى المساجد قبل ما تتحرموا منها بس خدوا معاكوا حاجة تسجدوا عليها
- بلاااااااااااااااااااااااااش اختلاط بدون داعى
- بلاش تطلع اشاعات ولا تاخد معلومات من اى جهة مجهولة خلى معلوماتك بس من الجهات الرسمية حتى لو مش واثق فيهم .. اعمل اللى عليك
- لم يثبت علميا تاثر المرض ده بحرارة الصيف
- مش مهم اطلاقا حاليا انها مؤامرة ولا لاء المهم انه فى مرض وفى وفيات وفيه انتشار باعداد كبيرة
- كل اللى قلناه ده مش هيمنع المرض نهائى لسه فى ثغرات كتير جدا ممكن يدخلك منها ولكن ده علشان يكون اديت ما عليك وتكون حققت جزء مهم وانتى بتدعى ربنا انه ينجينا ويحفظ اهلنا من الوباء ده ..
لان هو وحده فقط سبحانه وتعالى قادر على انهاء هذا البلاء
فى الاخر تحية كبيرة واجبه منا لكل طبيب وممرض فى موقعه حاليا فى المناطق اللى كل مصاب هيتوجه ليها علشان بيعرضوا نفسهم واهلهم للخطر ونتمنى انه يكون فى وسائل حماية كافية ليهم
(ارتداء اللبس بتاع الوقاية ده طول اليوم متعب جدا فى حد ذاته)
نسترجل لان الدنيا متبدهلة فى العالم المتقدم بره لاقدر الله عندنا لو حصل تفشى للموضوع ده هنزعل منه جامد وهنزعل من الاجرائات اللى هتتم علينا
- الموضوع ده هينتهى هينتهى باذن اللى بس كل بلاء داخله رحمة حاولوا تتاملوا فيها وهننبسط واحنا بنتفرج على احتفال دول الاتحاد الاوروبى بعد تخطى الازمة
- كورونا مش مشكلتنا الوحيدة فى ازمة المياة فى اخطر مراحلها
- ربنا يستر واليهود مستغلوش الموقف الحالى وياثروا المسجد الاقصى اكتر
ربنا يحمى الجميع
ليست هناك تعليقات:
إرسال تعليق